१७ साउन, ब्राजिलमा पछिल्लो २४ घन्टामा ५२ हजारभन्दा बढी कोरोना भाइरसका सङ्क्रमित थपिएका छन् । ब्राजिलमा २४ घन्टा यता मात्र करिब ५२ हजार ३८३ जनामा कोरोना भाइरसको सङ्क्रमण देखिएको प्राप्त पछिल्लो समाचारमा जनाइएको छ ।
ब्राजिलको स्वास्थ्य मन्त्रालयको अनुसार ब्राजिलमा सङ्क्रमितको संख्या कम्तीमा पनि २६ लाख पुगेको जनाएको छ । अधिकारीहरुले जनाए अनुसार सङ्क्रमितको पछिल्लो संख्या २६ लाख ६६ हजारभन्दा बढी पुगेको छ । गएको २४ घन्टामा यहाँ १ हजार २१२ जनाको कोरोना भाइरसका कारण निधन भएको छ । शुक्रबार दिइएको जानकारी अनुसार ९२ हजार भन्दा बढीले कोरोनाकै कारण ज्यान गुमाएका छन् ।
गत बिहीबारको परीक्षणको तुलनामा ब्राजिलमा पछिल्लो समयमा सङ्क्रमितको संख्यामा भने केही कमी आएको छ । बिहीबार यहाँ ६९ हजारभन्दा बढी सङ्क्रमित देखिएकोमा शुक्रबार यो संख्यामा कमी आएको हो । ब्राजिल अमेरिकापछि सबैभन्दा बढी कोरोना प्रभावित देश हो।
ब्राजिलमा दैनिक ५० हजारभन्दा बढी मानिस सङ्क्रमित हुने गरेका छन् । यहाँको स्वास्थ्य मन्त्रालयलका अनुसार यहाँका १८ लाखभन्दा बढी मानिस भने निको भएर घर फर्किएका बताइएको छ ।
