कञ्चनपुर: नेपाली कांग्रेस कञ्चनपुरले सत्ता गठबन्धनका उम्मेदवारहरुविरुद्ध नलाग्न कार्यकर्तालाई कडा निर्देशन दिएको छ।
जिल्ला कार्यसमितिका सचिव भीम भट्टले मंगलबार विज्ञप्ति जारी गर्दै वाम-लोकतान्त्रिक गठबन्धनका आधिकारिक उम्मेदवारबाहेक अन्यको पक्षपोषण नगर्न निर्देशन दिएको हो।
‘आधिकारिक उम्मेदवारबाहेकलाई पक्षपोषण हुने गरी कुनै किसिमका अभिव्यक्ति नदिन, सामाजिक सञ्जालमा पोष्ट, कमेन्ट र लाइक तथा कुनै प्रचारप्रसार जस्ता कार्य नगर्न अनुरोध छ,’ विज्ञप्तिमा भनिएको छ।
‘आ-आफ्नो टोल वडा छोडेर उम्मेदवारको पछिपछि लाग्ने परम्पराले स्थानीयबासीसँग छलफल विचार आदानप्रदान तथा सहजीकरण कार्यमा असहजता उत्पन्न हुन जाने भएकाले आ-आफ्नो वडामा केन्द्रित भै सक्रिय हुन समस्त नेता, कार्यकर्तालाई अनुरोध गरिन्छ,’ विज्ञिप्तिमा भनिएको छ।
