२८ माघ, काठमाडौं । निर्देशक दीपक श्रेष्ठले नयाँ चलचित्र ‘घिन्ताङ’को तयारीमा जुटेका छन् । यो चलचित्रका लागि दीपकले नायकमा गौरव पहारी र नायिकामा एलिजा गौतमलाई साइन गरिसकेका छन् ।
चलचित्रको छायांकन फागुनको पहिलो साताबाट सुरु गर्ने योजना रहेको छ । तर, चलचित्रको छायांकन सुरु हुनु भन्दा केही दिन अगाडि मात्र नायिका गौतमले चलचित्र छाडेकी छिन् । उनले, मंगलबार चलचित्रबाट आफू अलग भएको जानकारी निर्देशक श्रेष्ठलाई गराएकी हुन् ।
एलिजाले आफूले समय दिन नसक्ने भएपछि चलचित्र छाडेको बताइन् । उनले भनिन्–‘म क्यानडा जाँदैछु । मेरो बुबाको स्वास्थ्य अवस्था पनि विग्रिएको छ । यसैले पनि चलचित्रका लागि समय दिन सकिनँ ।’
एलिजाले चलचित्र छाडेपछि दीपक यतिबेला नायिकाको खोजीमा लागेका छन् । चलचित्र ‘अनुराग’बाट यो क्षेत्रमा भित्रिएकी एलिजा म्यूजिक भिडियोमा चम्किरहेकी छिन् ।
