१० असार, काठमाण्डौ। राष्ट्रपति विद्यादेवी भण्डारीले लोकसेवा आयोग, अख्तियार दुरुवयोग अनुसन्धान आयोग लगायतका संवैधानिक निकायका पदाधिकारी नियुक्ति गरेकी छिन्। भण्डारीले ११ संवैधानिक निकायमा २० पदाधिकारी नियुक्त गरेकी हुन् ।
राष्ट्रपति कार्यालयका प्रवक्ता रुपनारायण भट्टराईले विज्ञप्ति जारी गरी २० पदाधिकारी नियुक्त गरेको जनाएका छन् । केपी शर्मा ओली नेतृत्वको संवैधानिक परिषद्को सिफारिशमा राष्ट्रपतिले पदाधिकारी नियुक्त गरेकी हुन् ।
सरकारले अध्यादेशमार्फत संवैधानिक परिषद्सम्बन्धी ऐन संशोधन गरेपछि परिषद् सदस्य एवं प्रमुख प्रतिपक्षी दलका नेता शेरबहादुर देउवा र सभामुख अग्निप्रसाद सापकोटाले बैठक बहिष्कार गरेका थिए ।
देउवा र सापकोटाले बैठक बहिष्कार गरे पनि परिषद्ले संवैधानिक निकायमा नियुक्तिका लागि सिफारिश गरेको थियो । प्रतिनिधि सभा विघटन गरिएकाले संसदीय सुनुवाइविना उनीहरूको नियुक्ति गरिएको हो ।
नियुक्त भएकामा अख्तियार दुरुपयोग अनुसन्धान आयोगमा दुई, लोक सेवा आयोगमा पाँच, निर्वाचन आयोगमा एकसहित छन् ।
