यी हुन् सुदूरपश्चिममा एमालेका १५ उम्मेदवार, अछाममा भीम रावलले टिकट पाएनन्

काठमाडौँ: प्रमुख प्रतिपक्षी दल नेकपा एमालेले सुदूरपश्चिम प्रदेशका १५ निर्वाचन क्षेत्रमा संघीय निर्वाचनका लागि उम्मेदवार तोकेको छ ।

एमालेले प्रदेशका सबै उम्मेदवारको टुंगो लगाउँदै सम्बन्धित प्रदेश इन्चार्जमार्फत टिकट पठाएको हो। तर अछाम-१ मा भीम रावलको ठाउँमा माओवादीबाट एमाले प्रवेश गरेका झपट बोहोराले टिकट पाएका छन् ।

अध्यक्ष केपी शर्मा ओलीको कडा आलोचक तथा १० औं महाधिवेशनमा अध्यक्ष पदका प्रतिस्पर्धी रावलले अछाम १ मा एमालेबाट प्रतिनिधिसभातर्फको टिकट नपाउने भएका हुन् । अछाम जिल्ला कमिटीले रावलको नाम सर्वसम्मत एकल सिफारिस गरेको थियो । १० बुँदेमार्फत् एमालेमा रहेको भन्दै अध्यक्ष ओलीले प्रतिशोध साँधेर टिकट नदिएको रावल निकट नेता बताउँछन् ।

रावलको ठाउँमा झपट बोहरा अब प्रतिनिधिसभाको चुनाव लड्ने भएका हुन् । यस्तै अछाम २ मा यज्ञ बोगटी, कञ्चनपुर–१ बाट तारा लामा, २ बाट नरबहादुर धामी र ३ बाट निरु पालले टिकट पाएका छन् । कैलाली १ मा टपेन्द्र रावल, २ मा झपट रावल, ३ मा गौरीशंकर चौधरी, ४ मा लेखराज भट्ट, ५ मा नारदमुनि रानालाई उम्मेदवार बनाइएको छ ।

जसअनुसार मंसिर ४ गते हुने संघ र प्रदेशसभाको निर्वाचन अन्तर्गत नेकपा एमालेले बझाङमा ऐन महर, दार्चुला गणेश ठगुन्ना र बैतडीमा दामोदर भण्डारी लाई उम्मेदवार बनाएको छ । त्यस्तै डोटीमा गौरी ओली र बाजुरामा कर्णबहादुर थापा प्रतिनिधिसभाको लागि उम्मेदबार बन्ने भएका हुन् ।