२२ श्रावण, काठमाण्डौ। नेपाली कांग्रेसले पार्टीको केन्द्रीय कार्यसमितिको बैठक यही श्रावण २८ गते बोलाएको छ ।
पार्टी केन्द्रीय कार्यालय सानेपामा दिउँसो २ः०० बजे बस्ने बैठकमा पार्टीको १४औँ महाधिवेशनको कार्यतालिका र निर्वाचन निर्देशिका प्रस्तुत गरिने कांग्रेस मुख्य सचिव कृष्णप्रसाद पौडेलले जानकारी दिनुभयो । कांग्रेसले १४औँ महाधिवेशन आगामी भदौ १६ देखि १९ गतेसम्म काठमाडौँमा गर्ने कार्यतालिका सार्वजनिक गरिसकेको छ ।
कार्यतालिकाअनुसार गाउँ÷नगर वडाअधिवेशन यही श्रावण १२ गते, गाउँ÷नगरपालिका अधिवेशन श्रावण १६ गते, प्रदेशसभा क्षेत्रीय अधिवेशन श्रावण २० गते तोकिएको थियो । यद्यपी क्रियाशील सदस्यताको विवादका कारण श्रावण २० गतेसम्मको अधिवेशन कार्यतालिका प्रभावित भइसकेको छ ।
यसैगरी प्रतिनिधिसभा क्षेत्रीय अधिवेशन÷एक मात्र प्रतिनिधिसभा निर्वाचन क्षेत्र भएको जिल्ला अधिवेशन साउन २३ गते, एकभन्दा बढी प्रतिनिधिसभा निर्वाचन क्षेत्र भएको जिल्ला अधिवेशन श्रावण २६ गते र प्रदेश अधिवेशन भदौ १ र २ गते निर्धारण गरिएको छ ।
