कक्षा ११ मा हरेक विषयमा न्यूनतम ‘डी प्लस’ ल्याउनेले मात्र कक्षा १२ को परीक्षा फारम भर्न पाउने भएका छन् । राष्ट्रिय परीक्षा बोर्डले मंगलबार पारित गरेको कार्यविधिमा विद्यालयले कक्षा ११ को मूल्यांकन गर्ने र न्यूनतम डी प्लस ल्याएकाले मात्र कक्षा १२ को फारम भर्न पाउने उल्लेख छ ।
राष्ट्रिय परीक्षा बोर्डका अध्यक्ष प्रा.डा.चन्द्रमणि पौडेलले विद्यालयले आफ्नो अनुकूलतामा परीक्षा लिएर विद्यार्थीको मूल्यांकन गर्ने गरी कार्यविधि पारित भएको बताए । परीक्षा नियन्त्रक कृष्णप्रसाद शर्माका अनुसार विद्यार्थीलाई आफ्नो नतिजामा चित्त नबुझेमा उनीहरूले रिटोटलिङ, रिचेकिङ गर्न पाउनेछन् ।
विद्यालयमा प्रधानाध्यापकको संयोजकत्वमा परीक्षा मूल्यांकन समिति रहने र विद्यालयको परीक्षा मूल्यांकन समितिले आवश्यक देखेमा ग्रेड वृद्धि परीक्षासमेत लिन पाउने व्यवस्था छ । रिटोटलिङ तथा ग्रेड वृद्धि सबैको नतिजा कक्षा १२ को परीक्षा फारम भर्नुभन्दा पहिले नै बोर्डमा पठाउनुपर्ने व्यवस्था छ ।
कोभिड–१९ का कारण असामान्य परिस्थिति भएपछि यसअघि तय भएको परीक्षा स्थगित भएको थियो । कक्षा ११ र १२ मा करिब नौ लाख ६४ हजारले परीक्षा फारम भरेका थिए । कक्षा ११ मा पाँच लाख ३२ हजारभन्दा बढीले परीक्षा आवेदन भरेका छन् । कक्षा १२ मा चार लाख ३१ हजारभन्दा बढी परीक्षार्थी छन् । कक्षा १२ मा अनुकूल समयमा परीक्षा लिने तयारी छ भने ११ को परीक्षा सधैँ विद्यायलबाटै हुने भनि मूल्यांकनका लागि राष्ट्रिय परीक्षा बोर्डलाई जिम्मा दिएको छ ।
बोर्डले कार्यविधि निर्माणको काम सुरु गरेको थियो । कोभिड–१९ का कारण उत्पन्न परिस्थितिका कारण यसअघि सरकारले माध्यमिक शिक्षा परीक्षा (एसइइ)को विद्यालयले आन्तरिक मूल्यांकन गर्ने र जिल्लास्थित शिक्षा विकास तथा समन्वय एकाइबाट प्रमाणीकरण भएर राष्ट्रिय परीक्षा बोर्डले ग्रेडसिट जारी गर्ने निर्णयअनुसार काम भइरहेको छ ।
अहिलेसम्म कक्षा ११ र १२ को संयुक्त रूपमा एक हजार पूर्णांकको ग्रेडसिट पाउँदै आएका थिए ।
यो वर्ष पाँच सय पूर्णांकको पाउनेछन् । नयाँ पाठ्यक्रम कार्यान्वयन भएपछि ६ सय पूर्णांकको ग्रेडसिट हुनेछ । सरकारले ०७७ देखि कक्षा ११ को नयाँ पाठ्यक्रम लागू गर्ने निर्णय गरेको छ ।
[sidebar name="button post"]
